Drie-Eenheid Verduidelik

---

Die moeilikste ding van die Christelike konsep van die Drie-eenheid is dat daar geen manier is om dit perfek en volledig te verstaan nie. Die Drie-eenheid is 'n konsep wat onmoontlik is vir enige mens om ten volle te verstaan, laat staan nog te verduidelik. God is oneindig groter as ons; daarom moet ons nie verwag om Hom ten volle te kan verstaan nie. Die Bybel leer dat die Vader God is, dat Jesus God is en dat die Heilige Gees God is. Die Bybel leer ook dat daar net een God is. Alhoewel ons 'n paar feite oor die verhouding van die verskillende Persone van die Drie-eenheid met mekaar kan verstaan, is dit uiteindelik onverstaanbaar vir die menslike verstand. Dit beteken egter nie dat die Drie-eenheid nie waar is of dat dit nie op die leringe van die Bybel gebaseer is nie. Die Drie-eenheid is een God wat in drie Persone bestaan. Verstaan dan dat dit nie op enige manier drie gode voorstel nie. Hou in gedagte wanneer jy hierdie onderwerp bestudeer dat die woord “Drie-eenheid” nie in die Skrif voorkom nie. Dit is 'n term wat gebruik word om te probeer om die drie-enige God te beskryf - drie naasbestaande, mede-ewige Persone wat God is. Van werklike belang is dat die konsep wat deur die woord “Drie-eenheid” voorgestel word, wel in die Skrif bestaan. Die volgende is wat God se Woord oor die Drie-eenheid sê: 1) Daar is net een God (Deuteronomium 6:4; 1 Korinthiërs 8:4; Galasiërs 3:20; 1 Timoteus 2:5). 2) Die Drie-eenheid bestaan uit drie Persone (Genesis 1:1, 26; 3:22; 11:7; Jesaja 6:8, 48:16, 61:1; Matteus 3:16-17, 28:19; 2 Korinthiërs 13:14). In Genesis 1:1 word die Hebreeuse meervoudsnaamwoord "Elohim" gebruik. In Genesis 1:26, 3:22, 11:7 en Jesaja 6:8 word die meervoudige voornaamwoord vir “ons” gebruik. Die woord "Elohim" en die voornaamwoord "ons" is meervoudsvorme, wat beslis in die Hebreeuse taal na meer as twee verwys. Alhoewel dit nie 'n eksplisiete argument vir die Drie-eenheid is nie, dui dit wel op die aspek van pluraliteit in God. Die Hebreeuse woord vir "God," "Elohim," laat beslis die Drie-eenheid toe. In Jesaja 48:16 en 61:1 praat die Seun terwyl hy na die Vader en die Heilige Gees verwys. Vergelyk Jesaja 61:1 met Lukas 4:14-19 om te sien dat dit die Seun is wat praat. Matteus 3:16-17 beskryf die gebeurtenis van Jesus se doop. In hierdie gedeelte word gesien hoe God die Heilige Gees op God die Seun neerdaal terwyl God die Vader Sy welbehae in die Seun verkondig. Matteus 28:19 en 2 Korintiërs 13:14 is ander voorbeelde van gedeeltes wat drie afsonderlike Persone in die Drie-eenheid voorstel. 3) Die lede van die Drie-eenheid word in verskeie gedeeltes van mekaar onderskei. In die Ou Testament word “HERE” van “Here” onderskei (Genesis 19:24; Hosea 1:4). Die HERE het 'n Seun (Psalm 2:7, 12; Spreuke 30:2-4). Die Gees word onderskei van die “HERE” (Numeri 27:18) en van “God” (Psalm 51:10-12). God die Seun word van God die Vader onderskei (Psalm 45:6-7; Hebreërs 1:8-9). In die Nuwe Testament praat Jesus met die Vader oor die stuur van 'n Helper, die Heilige Gees (Joh. 14:16-17). Dit wys dat Jesus Homself nie as die Vader of die Heilige Gees beskou het nie. Beskou ook die ander gevalle wanneer Jesus met die Vader praat. Het Hy met Homself gepraat? Nee. Hy het met 'n ander Persoon in die Drie-eenheid gepraat—die Vader. 4) Elke lid van die Drie-eenheid is God. Die Vader is God (Johannes 6:27; Romeine 1:7; 1 Petrus 1:2). Die Seun is God (Johannes 1:1, 14; Romeine 9:5; Kolossense 2:9; Hebreërs 1:8; 1 Johannes 5:20). Die Heilige Gees is God (Handelinge 5:3-4; 1 Korintiërs 3:16). 5) Daar is ondergeskiktheid binne die Drie-eenheid. Die Skrif wys dat die Heilige Gees ondergeskik is aan die Vader en die Seun, en die Seun is ondergeskik aan die Vader. Dit is 'n interne verhouding en ontken nie die godheid van enige Persoon van die Drie-eenheid nie. Dit is eenvoudig iets wat ons eindige verstand nie kan verstaan aangaande die oneindige God nie. Sien Lukas 22:42, Johannes 5:36, Johannes 20:21 en 1 Johannes 4:14 aangaande die Seun. Aangaande die Heilige Gees sien Johannes 14:16, 14:26, 15:26, 16:7, en veral Johannes 16:13-14. 6) Die individuele lede van die Drie-eenheid het verskillende take. Die Vader is die uiteindelike bron of oorsaak van die heelal (1 Korintiërs 8:6; Openbaring 4:11); goddelike openbaring (Openbaring 1:1); redding (Johannes 3:16-17); en Jesus se menslike werke (Johannes 5:17; 14:10). Die Vader begin al hierdie dinge Die Seun is die agent deur wie die Vader die volgende werke doen: die skepping en instandhouding van die heelal (1 Korintiërs 8:6; Joh. 1:3; Kolossense 1:16-17); goddelike openbaring (Johannes 1:1, 16:12-15; Matteus 11:27; Openbaring 1:1); en redding (2 Korintiërs 5:19; Matteus 1:21; Johannes 4:42). Die Vader doen al hierdie dinge deur die Seun, wat as Sy agent funksioneer Die Heilige Gees is die middel waardeur die Vader die volgende werke doen: skepping en instandhouding van die heelal (Genesis 1:2; Job 26:13; Psalm 104:30); goddelike openbaring (Johannes 16:12-15; Efesiërs 3:5; 2 Petrus 1:21); verlossing (Johannes 3:6; Titus 3:5; 1 Petrus 1:2); en Jesus se werke (Jesaja 61:1; Handelinge 10:38). So doen die Vader al hierdie dinge deur die krag van die Heilige Gees.